Nga raporti 24 orësh-Policia e Kosovës:

LËSHIM I ÇEQEVE PA MBULESË OSE TË RREME /KEQPËRDORIM I KARTELAVE TË BANKËS APO KREDITIT

Prishtinë 16.05.2022 – 15:00. Është arrestuar i dyshuari kosovar për arsye se i njëjti fshehtas kishte fotografuar kartelat bankare të klientëve në dyqanin ku punon dhe pastaj me të njëjtat kartela ka blerë kriptovaluta. Me këtë rast janë identifikuar disa persona që janë dëmtuar ekonomikisht dhe dëmi i shkaktuar është disa mijëra euro. Me urdhër të prokurorit i dyshuari është dërguar në mbajtje.

Më poshtë gjeni edhe njoftimin e Prokurorisë Themelore në Prishtinë rreth të njëjtit rast:

“Prokuroria Themelore në Prishtinë, njofton opinionin publik se pas pranimit të informacionit nga Sektori për Hetimin e Krimeve Kibernetike të Policisë së Kosovës, me dyshimin se është kryer vepra penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”, prokurori kujdestar nga Departamenti i Përgjithshëm, ka iniciuar rastin në drejtim të veprës penale të lartcekur, ku pas ndërmarrjes së veprimeve hetimore dhe sigurimit të provave, fillimisht policia ka arrestuar të dyshuarin A.S., në vendin e tij të punës dhe me urdhër të Prokurorit të Shtetit, i njëjti është ndaluar në kohëzgjatje prej 48 orësh, për shkak të veprës penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”, nga neni 301 të KPRK-së, pasi i njëjti dyshohet se në mënyrë të kundërligjshme, duke keqpërdorur pozitën dhe besimin e klientëve, dyshohet se ka vjedhur të dhënat e kartelave bankare të klientëve, të cilët kanë bërë blerje në dyqanin ku i dyshuari ka punuar si përgjegjës i ndërrimit, dhe pastaj këto të dhëna i njëjti i ka përdorur duke bërë blerje të monedhave – kriptovalutave, të cilat më pas i ka shitur dhe me këtë rast dyshohet se ka përfituar mjete-para në vlerë prej mbi 5,000.00 €. 

 Në këtë çështje penale, me urdhër të prokurorit është sekuestruar një pajisje elektronike (telefon) me të cilën dyshohet se është kryer vepra penale.”

Prokurori i Shtetit në koordinim me policinë janë duke i ndërmarrë veprimet e nevojshme hetimore, si dhe ndaj të dyshuarit do të vazhdohet me veprimet procedurale.