Gazetari Artan Hoxha ka deklaruar ditën e sotme se së shpejti do të ketë krime të rënda në Shkodër. Ky paralajmërim, sipas gazetarit vjen si mungesë e zbardhjes së ngjarjeve kriminale të ndodhura së fundmi, kryesuar sot nga vrasja e Naim Bajri.

Ndër të tjera në fjalën e tij, Hoxha tha se policia dhe prokuroria kanë dështuar në zbardhjen e ngjarjeve në këtë qytet, gjë që ka çuar edhe në vijimin e serive të vrasjeve në Shkodër.

“Moszbulimi i autorëve paralajmëron ngjarjen e radhës. Kanë një shprehje në veri: I dekun i pakallur. Pra, janë njerëz të vdekur që lëvizin në këmbë. Nuk kanë rrugë tjetër. Ose të mbyllen në shtëpi  ose të dalin dhe të vriten nga hasmi”, tha ai duke shtuar se Shkodra tani i ngjan Palermos së viteve ’80 ku mafia luftonte dhe vrisnin familjarët e njeri-tjetrit.

Sipas tij, vrasja e Xhabir Shegës në qershor të vitit 2015 ndodhi për shkak të ekzekutimit të djalit të viktimës së sotme.

“Një muaj para se të vritej Xhabir Shega kishte porositur një mjet të blinduar. Ishte një xhip i blinduar. e porositi, por nuk e përdori më. Unë kam hipur në atë mjet në Shqipërinë e mesme pasi ishte vrarë Shega sepse mjetin e mori një tjetër grup. Vrasja me snajper e Xhabir Shegës tregon se sa të vendosur ishin ata për ta vrarë atë. Ai u vra për vrasen e djalit të viktimes së sotme. Ai u vra nga shumë larg me snajper. U dyshua në atë kohë se vrasësi i Xhabir Shegës ishte një person me prapavijë ushtarake dhe i trajnuar nga NATO”, tha ai.