Kryeministri i Shqipërisë, Edi Rama, në orët e para të mëngjesit së 15 qershorit ka mbërritur në kryeqytetin e Ukrainës, Kiev.

Rama së bashku me kryeministrin e Malit të Zi, Dritan Abazoviç, kanë udhëtuar mbi 12 orë me tren nga qyteti i Pshemishit, Poloni – nga ku u bë nisja për në Ukrainë.

Dy krerët e Qeverive të Ballkanit Perëndimor u pritën nga forca të shumta ushtarake dhe delegacioni ukrainas.

Ata do të zhvillojnë disa takime të rëndësishme, ku fillimisht do të nisen drejt rajonit të Buchas, aty ku masakra ruse është vërtetuar më së shumti.

Rama dhe Abazoviç do të shohin nga afër zonat e bombarduara të Borodyanka-s dhe Irpin-it dhe ekspozitën për luftën ruso-ukrainase.

Më pas në orët e para të mesditës ata do të takohen me presidentin e Ukrainës, Volodymyr Zelensky, përcjell Albanian Post.

Nga aty tre liderët do të mbajnë një konferencë të  përbashkët për shtyp.

Vizita do të vijojë me takimin e kryeministrit të Ukrainës, Denys Shmyhal, dhe kryebashkiakut të Kievit, Vitali Klitschko.

Nuk do të mungojë as edhe një intervistë ekskluzive me  “New York Times”.

Rama është i shoqëruar nga Elisa Spiropali, Ministrja e Shtetit për Marrëdhëniet me Parlamentin, Endri Fuga, Drejtor i Agjencisë për Media dhe Informim, Volodymyr Shkurov, Ambasador i Republikës së Ukrainës në Shqipëri dhe Dorjan Duçka, Këshilltar i jashtëm.

Po ashtu me kryeministrin shqiptar ndodhen edhe gazetarët Ben Blushi dhe Baton Haxhiu.

Forcat Renea janë gjithashtu të pranishme për shkak se elementët e sigurisë: ushtria dhe policia janë te ngarkuara me situatën e krijuar.

Në pamjet e siguruar nga Albanian Post, vlen të theksohet se ndonëse prej muajsh Ukraina po i bën ballë pushtimit rus, Kievi mundohet të përcjellë një pamje tjetër.

Qytet i pastër, postblloqe elegante dhe automjete të kamufluara mirë, janë përshtypja e parë që merr nga Kievi.

Vizita për në Ukrainë ka ardhur si rrjedhojë e ftesës së presidentit ukrainas Zelenski bërë kryeministrit të Malit të Zi, Dritan Abazoviq. Ai në ndërkohë i ka sfiduar të gjithë kryeministrat e Ballkanit Perëndimor që t’i bashkohen në këtë vizitë. Nga të gjithë sfidës i është përgjigjur vetëm kryeministri shqipar Edi Rama, sigurisht që të mos e lërë të vetëm vëllain e tij nga përkatësia kombëtare, në një zonë të rrezikshme lufte. Edhe kryeministri maqedonas fillimisht ishte zotuar të shkonte në këtë vizitë por nuk dihet se pse është tërhequr. Gjasat më të mëdha janë se nuk ka dashur apo nuk ka guxuar të rrezikojë jetën e tij.

 

Leave a Reply

Your email address will not be published. Required fields are marked *