Barcelona u rikthye pas pushimit (ndeshjeve të ekipeve kombëtare) ashtu siç e kishte lënë kampionatin, duke shënuar 5 gola. Ndaj Sevilla, katalanasit morën fitoren e tretë të thellë sezonale, pas 5-1 ndaj Villarrealit dhe 5-0 ndaj Young Boys, pa harruar 7-0 ndaj Real Valladolidit. Një ndeshje që bëri të ndihet krenar Hansi Flick, i cili u shfaq më se i kënaqur në konferencën për shtyp, pas fitores 5-1:

“Ishte e rëndësishme të ktheheshim me fitore, pas pushimit. Po kalojmë një moment shumë të mire, megjithatë duhet të vazhdojmë t’i përmirësojmë gjërat”.

Barça e la ndeshjen gjysmë të mbyllur në pjesën e parë, por vazhdon të insistojë në idenë për të mos u dorëzuar: “Mendoj se luajtëm një pjesë të parë shumë të mirë. Pas shënimit të tre golave ​​ndihesh më mirë, por duhet të vazhdosh përpara, të mos ngelesh pas, sepse në të kundërt i jep mundësi rivalit”.

Hansi Flick i merr gjërat hap pas hapi: “Çdo ndeshje është e rëndësishme, jo vetëm të luash kundër klubeve të mëdha. Sevilla ishte gjithashtu e vështirë. Jemi kthyer shumë mirë nga pushimi. Jam shumë i kënaqur me rezultatin. Sonte festojmë rezultatin dhe nesër nisim përgatitjet për ndeshjen me Bayernin”.

Gjermani shpjegoi edhe lëvizjet në formacion: “Menduam se De Jong do të niste titullar, por kishte siklet dhe vendosëm që të mos rrezikonim. Mund të kishte luajtur disa minuta, por ne vendosëm për Gavin. Jam shumë i lumtur për Gavin, ishte e rëndësishme për të dhe ekipin që të kthehej. Sonte ishte momenti i tij. Duke qenë në stol, ëndrra e tij ishte të luante qoftë edhe për pesë minuta. I gjithë klubi është i lumtur për të”.

Robert Lewandowski nuk ndalet së shënuari, ndaj merr lavdet e trajnerit të vet: “Dueli i tij të mërkurën me Harry Kane? Le të mos i personalizojmë gjërat, nuk do të jetë një luftë mes dy lojtarëve. Është e rëndësishme që Robert po shënon rregullisht, jam i lumtur për të”.

E vetmja autokritikë e Flick ishte për golin e pësuar: “Duhej ta shmangnim pësimin e golit të 4-1, sepse gjithmonë duhet të ushtrojmë presion ndaj kujtdo që e ka topin”.

I pyetur nëse ata që kthehen nga lëndimet janë gati për të performuar, Hansi u shpreh me forcë: “Të gjithë lojtarët janë të përgatitur. Duhet të përgatitemi për çdo ndeshje, grupi është gati. Shpresoj që të luajnë në 100% të tyre, më pas do ta shohim rezultatin”.