Presidenti ukrainas Volodymyr Zelensky tha se i dërguari i posaçëm i SHBA për Ukrainën dhe Rusinë, Keith Kellogg do të vizitojë Kievin më 20 shkurt.

Volodymyr Zelensky dëshiron që Kellogg të vizitojë personalisht vijën e frontit dhe të flase me ushtrinë ukrainase.

“Ne jemi në pritje të Kellogg. Jemi marrë vesh që ai të vijë tek ne më 20 shkurt. Ai do të qëndrojë dy ditë, e ndoshta edhe më shumë. Unë dua të shkoj me të në vijën e parë, dhe ai do të shkojë me mua në vijën e parë. Nuk mendoj se do të refuzojë”, tha ai.

Zelensky vuri në dukje se ai dhe Kellogg do të shkojnë për të parë Oleksandr Syrsky, Komandantin e Përgjithshëm të Forcave të Armatosura të Ukrainës dhe komandantët e disa brigadave. Ai sugjeroi gjithashtu që i dërguari i Trump mund të takohej me zyrtarë të inteligjencës ukrainase dhe përfaqësues nga Departamenti i Mbrojtjes.

Presidenti theksoi rëndësinë për t’i treguar SHBA-së situatën reale në Ukrainë dhe rëndësinë e garancive të sigurisë.

“Unë mendoj se pas kthimit të tij në Shtetet e Bashkuara, ne do të dimë tashmë se kur do të zhvillohet takimi im me Presidentin Trump”, tha Zelensky.

Kujtojmë, presidenti amerikan Donald Trump tha më 16 shkurt se ai besonte se mund të takohej me liderin rus Vladimir Putin shumë shpejt për të diskutuar përfundimin e luftës në Ukrainë.
Presidenti amerikan pohoi se Ukraina do të kishte një vend në tryezë në negociatat për t’i dhënë fund luftës.